Hai paak rutba fikr se us beniyaaz ka
Kuch dakhl aql ka hai na kaam imtiyaaz ka

Lab band aur dil mein woh jalwe bhare huwe
Allah re jigar tere aagaahe raaz ka

Gash aa gaya kaleem ko mushtaaqe deed se
Jalwa bhi be niyaaz hai us beniyaaz ka

Har shay se hain ayaa(n) mere saane’ ki san-ate
Aalam sab aainon mein hai aaina saaz ka

Aflaako arz sab tere farmaa(n) pazeer hain
Haakim hai tu jahaa(n) ke nashebo faraaz ka

Is bakasi mein dil ko mere tek lag gayi
Shohra suna jo rehmate bekas nawaaz ka

Maaninde sham’a teri taraf lau lagi rahe
De lutf mere jaan ko sozo gudaaz ka

Tu be hisaab bakhsh ki hain be shumaar jurm
Deta hoon waasta tujhe shaahe hijaaz ka

Bande pe tere nafse laee(n) ho gaya muheet
Allah kar ilaaj meri hirso aaz ka

Kyun kar na mere kaam banein ghaib se Hasan
Banda bhi hoon to bade kaar saaz ka