Mera Rafiq e Kaar Tha Pyara Chala Gaya,
Maddah e Mustafa Tha Hamara Chala Gaya.

Qari Quran e Paak Ka Tha Aisa BeMisal,
Mehfil Pe Chaane Wala Dulara Chala Gaya.

Hans Mukh Tha Khush Mizaaj Tha Paikar Khuloos Ka,
Aankhen Talaashti Hai Nazara Chala Gaya.

Woh Bhaa Gaya Khuda Ko Khuda Ke Rasool Ko,
Is Waaste Wo Jald Bechara Chala Gaya.

Rizwan Ka Qamar Ka Qaa’id Ka Bawafa,
Ahle Sunan Ki Aankh Ka Tara Chala Gaya.

Aayi Bhi Maut Rahe Khuda Mein Khusha Naseeb,
Kar Ke Nabi Pe Jaan Nisara Chala Gaya

Hai Maah Yaar e Gaar Ka Tarikh Baarvih,
Ushshaq Mein Tha De Ke Ishara Chala Gaya.

Dhundo Amin Riyaz e Jina’n Me Riyaz Ko,
Hum Raaz Hum Mizaj Tha Tumhara Chala Gaya.

Hazrat Sayyed Aminul Qadri Sahab – Nigran Sunni Dawate Islami Malegaon