Dil e Ghamgeen Ki Itni Hai Khwahish Ya RasoolAllah,
Riyazuddin Par Ab Ho Nawazish Ya RasoolAllah.

Sana Khwan Aap Ka Din Raat Midhat Mein Basar Karta,
Paye Hassan Inki Bhi Ho Bakhshish Ya RasoolAllah.

Qur’an e Paak Ke Hafiz Qur’an e Paak Ke Qari,
Mile Quran Ki Inko Sifarish Ya RasoolAllah.

Teri Naaton Se Logon Ke Dilon Mein Ishq Bhar Dete,
Har Ek Lamha Yahi Rehti Thi Koshish Ya RasoolAllah.

Safe Hassan Mein Apne Gada Ko Tum Jagah Dena,
Chamakta Hi Rahe Ta Hashr Mehwish Ya RasoolAllah.

Lehed Mein Unki Lehrayen Khudara Noor Ke Chashme,
Na Wehshat Ho Na Ho Zulmat wa Sozish Ya RasoolAllah

Mile Ahle Quraabat Ko Bhi Aaqa Sabr Ki Daulat,
Shafee’ Ban Kar Karaaye Sab Ki Bakhshish Ya RasoolAllah.

Sila Khidmat Ka Mil Jaye Riyaz e Ashrafi Ko Bhi,,
Shaha Maqbool Ho Har Ek Kawish Ya RasoolAllah.

Qamar Ki Aankh Ka Tara Ye Tha Shakir Ka Bhi Pyara,
Is Aajiz Par Sada Rehmat Ki Baarish Ya RasoolAllah.

Fidayi Aap Ka Qadmon Pe Marne Ko Machalta Tha,
Use Qadmon Mein Rakh Lijiye Nawazish Ya RasoolAllah.

Tumhara Sayyed Ahmed Aur Riyazuddin Bhi Har Dam,
Sunaye Tum Ko Bas Naate’n Ho Bakhshish Ya RasoolAllah.

Tumhari Bazm Ho Aur Naat Padhta Ho Riyazuddin,
Yahi Sayyed Ki Tumse Hai Guzarish Ya RasoolAllah.

Al Haj Sayyed Mohammed Sahab- Nigran Sunni Dawate Islami Jaipur