Badi muddat hui ab to bula lo Ya Rasoolallah
Huzoori ka sharaf mujh ko ata ho Ya Rasoolallah

Ghataye gham ki chaayi hai mere Aaqa pareshan hu
Agisni Ya Rasoolallah agisni Ya Rasoolallah

Tarasti hai ye aankhen deed ko us sabz gumbad ki
Ziyarat qubbaye khazra karado Ya Rasoolallah

Sunehri jaaliyon ko dekh lu ik baar main Aaqa
Sunehri meri qismat ko bana do Ya Rasoolallah

Woh Mehrab o Minar o Jaaliya aur Gumbade Khazra
Karu deedaar mai har baar aakar Ya Rasoolallah

Main lu Jannat ki kyari ka meri peshani se bosa
Mai choomu is tarah naqshe Kafe Paa Ya Rasoolallah

Duroodo ke salaamo ke jo naghme gungunata hu
Tumhare dar pe aakar mai sunau Ya Rasoolallah

Padhu mai naate sarwar aapke darbaar me Aaqa
Adaa ho sunnate Hassaan mujhse Ya Rasoolallah

Rahe imaa salamat jaakani ke waqt mera bhi
Kaza ke waqt Taiba me bulalo Ya Rasoolallah

Baqiye paak me do gaz zamee mujh ko mayassar ho
Bane madfan Madine me mera bhi Ya Rasoolallah

Diya Hassaan o Jaami aur Saadi ko samandar jo
Ata ho uska ik katra mujhe bhi Ya Rasoolallah

Khaleel e naatawa o benawa ki aarzoo ye hai
Ghulami ki Sanad isko ata ho Ya Rasoolallah