Raah purkhaar hai kya hona hai
Paaun afgaar hai kya hona hai

Khushk hai khoon ki dushman zaalim
Sakht khookhaar hai kya hona hai

Hum ko bid kar wohi karna jisse
Dost bezaar hai kya hona hai

Tan ki ab kaun khabar le haiy haiy
Dil ka aazaar hai kya hona hai

Meethe sharbat de maseeha jab bhi
Zid hai inkaar hai kya hona hai

Dil ki teemaar humara karta
Aap beemaar hai kya hona hai

Par kate tang kafas aur bulbul
Nau giraftaar hai kya hona hai

Chup ke logon se kiye jis ke gunah
Woh khabardaar hai kya hona hai

Are O mujrime beparwa dekh
Sar pe talwaar hai kya hona hai

Tere beemaar ko mere Isaa
Gash lagataar hai kya hona hai

Nafse purzor ka woh zor aur dil
Zer hai zaar hai kya hona hai

Kaam zinda(n) ke kiye aur hume(n)
Shauqe gulzaar hai kya hona hai

Haaye re neend musaafir teri
Kooch taiyaar hai kya hona hai

Door jaana hai raha din thoda
Raah dushwaar hai kya hona hai

Ghar bhi jaana hai musaafir ki nahi
Mat pe kya maar hai kya hona hai

Jaan halkaan huwi jaati hai
Baar sa baar hai kya hona hai

Paar jaana hai nahi milti naau
Zor par dhaar hai kya hona hai

Raah to taig par aur talwon ko
Gilaye khaar hai kya hona hai

Raushni ki hume aadat aur ghar
Teera o taar hai kya hona hai

Beech mein aag ka dariya haail
Qasd us paar hai kya hona hai

Is kadi dhoop ko kyun kar jhele(n)
Sho’la zan naar hai kya hona hai

Haaye bigdi to kahan aakar naau
Ain manjhdhaar hai kya hona hai

Kal to deedaar ka din aur yaha(n)
Aankh bekaar hai kya hona hai

Muh dikhane ka nahi(n) aur sahar
Aam darbaar hai kya hona hai

Unko rehem aaye to aaye warna
Woh kadi maar hai kya hona hai

Le woh haakim ke sipaahi aaye
Subhe izhaar hai kya hona hai

Wa(n) nahi baat banaane ki majaal
Chaarah iqraar hai kya hona hai

Saath waalo ne yahi chchod diya
Bekasi yaar hai kya hona hai

Aakhri deed hai aao mil le(n)
Ranj bekaar hai kya hona hai

Dil hume tum se lagaana hi na tha
Ab safar baar hai kya hona hai

Jaan waalon pe ye rona kaisa
Banda naachaar hai kya hona hai

Naz’a mein dhyaan na bat jaaye kahi
Ye abas pyaar hai kya hona hai

Iska gham hai ki har ik ki soorat
Gale ka haar hai kya hona hai

Baate(n) kuch aur bhi tumse karte
Par kaha waar hai kya hona hai

Kyun Raza kud te ho haste uththo
Jab woh Gaffaar hai kya hona hai