Muntazir Dono Aalam The Jin ke Liye
Aaye Wo Aur Faili Khushi Har Taraf
Unke Aate Hi Zulmat Ke Badal Chaten
Chayi Tauheed Ki Roshni Har Taraf

Aaye Jibreel Noorie Sawari Liye
La makaa(n) Ki Taraf Mustafa Chal Diye
Farsh Se Arsh Tak Noor Hi Noor Tha
Dono Aalam Me Thi Sar khushi Har Taraf.

Noor Kaisa Wo Gaare Hira Se Chala
Aaj Tak Jiski Nooraniyat Kam Nahi
Kitne Seene Me Wo Noor Mehfooz Hai
Chan Rahi  Hai Wohi Raushni Har Taraf.

Taajdare Madina Chale Badr Ko
Teen sau Terah(313) Noorie Sipaahi Liye
Utre Jibreel Malkooti Lashkar Liye
Khil Uthi Fatha Ki Chandni Har Taraf.

Jab Uhad Me Mere Aaqa Zakhmi Hue
Khalbali Mach Gayi Saare Ashaab Me
Chand Taiba Ka Palbhar Ko Kya Chup Gaya
Cha Gayi Thi Faza Me Maatami Har Taraf.

Ye Lua’be Nabi Ka Hi Ajaaz Tha
Dukhti Aankhen Ali Ki Bhali Ho Gayi
Baabe Khaibar Ukhaada Ba Chasme Zadan
Goonj Utha Naara e Haidari Har Taraf.

Sabz Gumbad Ki Ranaaiya Kya Kahu
Mamba e Noor Hai Qibla e Ahle Dil
Yaan Wo Aaram Farmaan Hai Jinke Liye
Rab ne Takhleeq Ki Zindagi Har Taraf.

Urse Sayyed Miyan Ka Wo Shohra Hua
Is Qadar Ra’ub Barkaatiyat Ka Badha
Saare Dushman Pareshano Hairan Hai
Unke Halqo Me Hai Khalbali Har Taraf.

Nazmi Tere Liye Naat Ne’mat Bani
Ye Meem e Muhammad Ka Ajaaz Hai
Noor o Nikhat Ka Haamil Hai Tera Qalam
Kar Raha Hai Jo Zikre Nabi Har Taraf.