Dushmane Ahmed pe shiddat kijiye
Mulhidon ki kya murawwat kijiye

Zikr unka chediye har baat mein
Chedna shaitaa(n) ka aadat kijiye

Misle faaris zalzale ho najd mein
zikre aayaate wilaadat kijiye

Gaiz mein jal jaayen be deeno ke dil
Ya Rasoolallah ki kasrat kijiye

Kijiye charcha unhi ka subho shaam
Jaane kaafir par qayaamat kijiye

Aap dargaahe Khuda mein hain wajeeh
Haan shafa’at bil wajaahat kijiye

Haq tumhe farma chuka apna Habeeb
Ab shafa’at bil mahabbat kijiye

Izn kab ka mil chuka ab to Huzoor
Hum ghareebon ki shafa’at kijiye

Mulhidon ka shaq nikal jaaye Huzoor
Jaanibe mah phir ishaarat kijiye

Shirk thehre jis mein taa’zeeme Habeeb
Us bure mazhab pe laa’nat kijiye

Zaalimo! Mehboob ka haq tha yehi
Ishq ke badle adaawat kijiye

Wadduha, Hujraat, Alam nashrah se phir
Momino! Itmaame hujjat kijiye

Baithte uthte Huzoore paak se
Iltijaa wa istiaanat kijiye

Ya Rasoolallah duhaaee aap ki
Goshmaale ahle bid’at kijiye

Gause Aa’zam aap se fariyaad hai
Zinda fir yeh paak millat kijiye

Ya Khuda tujh tak hai sab ka muntaha
Auliya ko huqme nusrat kijiye

Mere Aaqa Hazrate Achche Miyaan
Ho Raza achcha woh soorat kijiye