Karam maangta hu ata mangta hu
Shah e deen ki ulfat sada mangta hu

Main hu mubtala marz e isyan me Moula
Muhammad ke sadqe shifa mangta hu

Meri zindgi unki ulfat me guzre
Dar e Mustafa par qaza mangta hu

Nazar me basa hai tere ghar ka jalwa
Sar e hashr behtar liqa mangta hu

Jahan bhar me sab hain musalman pareshan
Dua me unhi ka bhala mangta hu

Meri zist ka hai yahi ek unwan
ke Shah e deen ki wila mangta hu

Tere dar ka sayil hai Shakir khudaya
Main tujh se teri hi raza mangta hu