Dilon Nigaah ki Duniya Nayi Nayi Hui Hai

Durood Padhte Hi Ye Kaisi Raushni Hui Hai

Main Bas Yoon Hi Nahi Aa Gaya Hoon Mehfil Mein

Kahi Se Izn Mila Hai To Haazri hui Hai

Jahaan e Kun Se Udhar Kya Tha? Kaun Jaanta Tha?

Magar Who Noor Ke Jis Se Ye Zindagi Hui Hai

Hazaar Shukr Ghulaaman e Shah e Batha Mein

Shuru Din Se Meri Haazri Lagi Hui Hai

Baham The Daaman e Rehmat Se Jab To Chain Se The

Judaa Hue Hain To Ab Jaan Par Bani Hui Hai

Ye Sar Uthaye Jo Main Ja Raha hoon Jaanib e Khuld

Meri Liye Mere Aaqa Ne Baat Ki Hui Hai

Mujhe Yaqeen Hai Who Aayenge Waqt e Aakhir bhi

Main Keh Sakunga Ziyarat Abhi Abhi Hui Hai.