Khuda Se Apni Ummat Ke Liye Poocha Jo Moosa Ne
To Farmaya Ke Afzal Sab Se Hai Ummat Muhammad ﷺ Ki

Ye Rehmat Hai Ke Dete Hain Dua’en Dushmano Ko Bhi
Niraali Saari Aalam Se Hai Har Aadat Muhammad ﷺ Ki

Khuda Is Waaste Qayam Karega Bazme Mehshar Ko
Ke Dekhen Awwalin o Aakhirin Izzat Muhammad ﷺ Ki

Gunahgaron Me Kahaan Phirte Ho Sargardaan Chale Aa’o…
Tumhari Justuju Me Phirti Hai Rehmat Muhammad ﷺ Ki

Nabi Ke Naam Lewa Aane Wale Hain Thake Haare
Sajaayi Jaati Hai Is Waaste Jannat Muhammad ﷺ Ki

Malaaik Rokte Hain Is Liye Auron Ko Jannat Se
Ke Laayi Jaaye Pehle Khuld Me Ummat Muhammad ﷺ Ki

Jameele Qaadri Razvi Tumhe Kyun Khaufe Mehshar Ho
Ke Tere Dil Ke Aayine Me Hai Soorat Muhammad ﷺ Ki