Milke khaase kibriyaa ho
Maalike har maa siwa ho
Koi kya jaane ki kya ho
Aqle aalam se wara ho

Kanze maktoome azal mein
Durre maknoone Khuda ho
Sab se awwal sab se aakhir
Ibtidaa ho intihaa ho

The waseele sab Nabi tum
Asl maqsoode huda ho
Paak karne ko wuzoo the
Tum namaaze jaa(n) fizaa ho

Sab bashaarat ki azaa(n) the
Tum azaa(n) ka mudda’a ho
Sab tumhari hi khabar the
Tum muakkhar mubtada ho

Qurbe Haq ki manzile(n) the
Tum safar ka muntaha ho
Qable zikr izmaar kya jab
Rutba saabiq aap ka ho

Toore Moosa charkhe Isaa
Kya musaawiyye danaa ho
Sab jihat ke daayre mein
Shash jihat se tum wara ho

Sab maqaa(n) tum laa maqaa(n) mein
Tan hain tum jaane safa ho
Sab tumhare dar ke raste
Ek tum raahe Khuda ho

Sab tumhaare aage shaafe’
Tum huzoore kibriyaaho
Sab ki hai tum tak rasaayi
Baargaah tak tum rasaa ho

Woh kalas rauze ka chamka
Sar jhukaao kaj kulaaho
Woh dare daulat pe aaye
Jholiya failaao shaaho