Kya mehekte hain mehekne wale
Boo pe chalte hain bhatakne wale

Jagmaga uththi mere gor ki khaak
Tere qurbaan chamakne wale

Mahe be daag ke sadqe jaaoon
Yoon damakte hain damakne wale

Arsh tak faili hai taabe aariz
Kya jhalkte hain jhalakne wale

Gule Taiba ki sana gaate hain
Nakhle tooba pe chahakne wale

Aasiyon thaam lo daaman unka
Woh nahi haath jhatakne wale

Abre rehmat ke salaami rehna
Falte hain paude lachakne waee

Are yeh jalwa gahe jaanaa(n) hai
Kuch adab bhi hai fadakne wale

Sunniyon unse madad maange jaao
Pade bakte rahe bakne wale

Sham’e yaade rukhe jaanaa(n) na bujhe
Khaak ho jaaye bhadakne waale

Maut kehti hai ki jalwa hai qareeb
Ik zara so le bilakne wale

Koi un tez rawo(n) se keh do
Kiske ho kar rahen thakne wale

Dil sulagta hi bhala hai aye zabt
Bhuj bhi jaate hain dehekne wale

Hum bhi kumbhlaane se gaafil the kabhi
Kya hansa gunche chatakne wale

Nakhl se chchoot ke ye haal huwa
Aah O patte khadakne wale

Jab gire muh suye maikhana tha
Hosh mein hain ye behekne wale

Dekh O zakhme dil aape ko sambhal
Foot behte hain tapakne wale

Mai kaha(n) aur kaha(n) main zahid
Yoon bhi to chakte hain chakne wale

Kafe dariya karam mein hain Raza
Paanch fawwaare chalakne wale